Kva er ein god struktur?

Det å ha ein god struktur er veldig viktig når du skal skriva akademiske oppgåver. Ein god struktur hjelper deg å organisere dine tankar og gjer det enklare for lesaren å følgje argumentasjonen di.

 

Ulike fagdisiplinar har ulike krav til kva som er ein god struktur. Tradisjonelt sett har til dømes  IMRoD-strukturen (IMRaD) vore vanleg innan naturvitskaplege disiplinar, medan ein særleg i humaniora kan ha ein friare struktur. Sjekk med rettleiaren din kva som er forventa struktur på akkurat di oppgåve. 

Størrelsen på oppgåva du skriv er også vesentleg for å avgjera korleis strukturen bør vera. Det er visse element du må ha med uansett om du skriv ei stor eller ei lita oppgåve og det er: 

• Ei innleiing som fortel kva du skal skriva om/undersøka
• Ein hovuddel kor du skriv om/undersøker det du sa i innleiinga at du skulle
• Ein avslutning/konklusjon kor du konkluderer med kva du fann ut

 

Innleiing: Kva skal du gjera?

I innleiinga presenterer du (veldig kort) temaet ditt, problemstillinga di, kva du har tenkt å gjera og formålet med oppgåva di. Dette skriv du for å gjera lesaren interessert i å lesa oppgåva di og for å gi hen ein oversikt over oppgåva.

• Presenter til dømes relevant statistikk eller fakta som skaper interesse
• Kva er problemstillinga eller hypotesen di? Kva skal DU finna ut, kvifor skal du finne ut av det og korleis skal du gjere det? Merk at det i alle deler av oppgåva di er viktig å grunngi vala og meiningane dine grundig
• Kva skal du IKKJE finna ut? Ein kan ikkje dekka alle deler av emnet og det er dermed lurt å presentera allereie i innleiinga kva du ikkje kjem til å ha i fokus. Så slepp lesaren å lura på det.
• Nokre gonger kan det også vera hensiktsmessig å ha litt bakgrunnsteori her. Det kjem an på oppgåva.

 

Hoveddel: Gjer det du sa du skulle gjera

Her drøfter du problemstillinga di i lys av relevant teori og relevante døme, støtter opp om påstandar eller kritiser dem, til dømes ved hjelp av forsking eller eigen praksiserfaring. Du kan lese meir om drøfting i modulen «Drøfting og akademisk språk».

 

Avslutning: Sei kva du har gjort

Avslutninga kan innehalde ei kort oppsummering av dei viktigaste poenga dine og ein konklusjon. Her er det viktig at du ikkje presenterer ny informasjon. Då vil lesaren undra over kvifor dette ikkje har blitt presentert før.

 

Det er vanleg å seia at innleiing og avslutning skal vera på ca. 10% (totalt 20%) av antall ord du er gitt til oppgåva.  Det er særleg viktig å ikkje bruka for mykje ord på desse delene i små oppgåver då desse ikkje gjer så mykje "mat" til sjølve oppgåva. Bruk heller energi og ord på hovuddelen kor du får vist din faktiske kunnskap i emnet.

Jo større ein oppgåve er, desto vanlegare er det å bryte opp kapitla i underkapitla. Spør faglærar om du er usikker på kva for struktur som er forventa.